सरीवर येते सर

सरीवर येते सर
घेऊन हिरवा मोहोर
रानावनात गारवा
फुलापाना आला बहर

सरीवर येते सर
वाढे पावसाचा जोर
भिजलेल्या झोपडीला
थेंब थेंबाची झालर

सरीवर येते सर
मेघ धरू लागले ग फेर
विजांशी खेळताना
होतो वाराही मुजोर

सरीवर येते सर
वाहू लागले निर्झर
ओल्या अंगणात माझ्या
नाचू लागले ग मोर

सरीवर येते सर
जाऊ नको दूर दूर
तुझ्या मिठीत होईल
माझे आकाश बेजार.

सरीवर येते सर
झाले चांदणे धुसर
तुझ्या माझ्या सोबतीला
चिंब रातीचा प्रहर.